ལྡོང་ཡོན་ཏན་རྒྱ་མཚོའི་དྲ་བ།

སྡོམ་ཚིག

ཆོས་སྒྲུབ་སྟངས་ཀྱི་གསར་འགྱུར་མཚར་བོ་འགའ།

ཆོས་སྒྲུབ་སྟངས་ཀྱི་གསར་འགྱུར་མཚར་བོ་འགའ། ལྡོང་ཡོན་ཏན་རྒྱ་མཚོ། ལོ་སྔོན་མ་ཞིག་ཏུ་མང་ཚོགས་མང་བོས་ཀི་དིར་བྱས་ཏེ་བདེ་བ་ཅན་དུ་འགྲོ་འདོད་ཀྱི་རྣམ་འགྱུར་སྟོན་པའི་བརྙན་ཐུང་ཞིག་རིག་སོང་། བདེ་བ་ཅན་དུ་འགྲོ་འདོད་ཡོད་ན་ལོས་བཟང་མོད། སྣེ་ཁྲིད་བྱེད་མཁན་དེས། ང་བདེ་བ་ཅན་དུ་འགྲོ་ཐུབ་སོང་ན་ཁྱེད་ཚོ་ཡང་འགྲོ་ངེས་ལ། ང་དམྱལ་བར་སྐྱེས་སོང་ན་ཁྱེད་ཚོ་ཡང་དམྱལ་བར་སྐྱེ་ངེས་པའི་ཐ་ཚིག་སྒྲོག་གིན་འདུག བདེ་འགྲོ་དང་ངན་འགྲོར་སྐྱེ་མིན་ཏེ་རང་རང་གིས་བསགས་པའི་དགེ་སྡིག་ལ་རག་ལས་པ་ལས། མི་ཁ་ཕོ་ཅན་ཞིག་གིས་རང་དགར་ཐག་གཅོད་ཐུབ་པ་ཞིག་ག་ན་ཡིན་ཨང་། ཉེ་སྔོན་ཁྱབ་སྒྲོག་ཁྱད་མཚར་ཞིག་གང་སར་བསྐུར་གྱིན་འདུག ལྷག་པར་དུ་རྒྱ་ཡིག་གི་དྲ་ཚིགས་དང་ཚོགས་པ་ཆུང་ཆུང་དག་ཏུ་ཤུགས་ཆེན་པོས་སྒྲོག་གིན་འདུག་ཟེར། ང་ལའང་མི་ཁ་ཤས་ཀྱིས་དྲིས་སོང་། ཁྱབ་སྒྲོག་གི་ནང་དོན་ནི། ཁྱོད་ཀྱིས་བསྙེན་པ་གང་རུང་ཞིག་ཉུང་ཙམ་བཏོན་ཏེ་ཚོགས་སྡེ་ཆེན་པོ་ཞིག་གི་ནང་མིང་ཐོ་བཀོད་པ་ཡིན་ན། ཚོགས་སྡེ་དེས་བཏོན་པའི་བསྙེན་པའི་གྲངས་ཀ་ཡོད་ཚད་ཁྱོད་ལ་ཐོབ་ངེས་ཟེར། རྒྱལ་བའི་བཀའ་བསྟན་བཅོས་གང་གི་ནང་དུ་དེ་འདྲའི་ཆོས་སྒྲུབ་སྟངས་ཤིག་གསུངས་ཡོད་པ་ཡིན་ནམ། གལ་སྲིད་དེ་འདྲའི་ཆོས་སྒྲུབ་སྟངས་སྐྱིད་པོ་ཞིག་ཡོད་ན། དྲ་ཚིགས་ཀྱི་རླབས་ཤུགས་དང་འགྲོགས་ནས་ཆོས་ཚོགས་གང་ཡོད་ཀྱི་ནང་དུ་མིང་ཐོ་རེ་བཀོད་རྗེས་ཉོན་མོངས་པའི་མལ་དུ་སྐྱིད་ཉལ་བརྒྱབ་བསྡད་ན་དགེ་ཚོགས་ཀྱི་རྒྱ་མཚོ་འཕྱུར་མི་འོང་ངམ། མདང་དགོང་གྲོགས་པོ་ཞིག་གིས་ཁ་པར་བཏང་ཡོང་ནས་བཤད་རྒྱུར། མཚན་གུང་གི་ཆུ་ཚོད་བཅུ་གཉིས་ལ་མ་ཐོན་སྔོན་དུ་བརྐྱང་ཕྱག་བཅུ་ཐམ་པ་ངེས་པར་དུ་འཚོལ་དང་ཁྱོད་ལ་བརྐྱང་ཕྱག་བྱེ་བ་གཅིག་ཐོབ་ཅེས་གསུང་གིན་འདུག་ཟེར། ང་ཅུང་ཙམ་བགད་པས་གྲོགས་པོ་དེ་དགའ་མ་སོང་། ཁོས་ཁྱེད་ཚོ་མཁས་པ་དག་གིས་ཅི་ཡང་ཁས་མི་ལེན་གི་ཟེར། ངས་ཁོ་ལ་ཁས་ལེན་སར་མི་འགྲོ་བ་ཞིག་བཙན་ཚུགས་ཀྱིས་ཁས་བླངས་ན་ཁས་ལེན་མཁན་དེ་ཡང་གློའུ་རུ་འགྱུར་འགྲོ། དགེ་བའི་འགྱུར་ཁྱད་ཟེར་བ་ཞིག་ཡོད་པ་བདེན་མོད། འགྱུར་ཁྱད་དེ་ལ་ཡང་རྒྱུ་ཚོགས་མང་བོ་ཞིག་འཛོམ་དགོས་པ་ལས་དུས་ཚོད་ཀྱི་ཅོང་གི་ཐོག་ལ་འཇོག་འཇོག་བྱེད་རྒྱུ་ཞིག་མ་རེད། གང་ཡིན་ལ་ཧོལ་རྒྱུགས་མ་བྱེད་ཅེས་བཤད་མོད། གྲོགས་པོ་དེས་ཧ་མ་གོ་བའམ་མ་དགའ་བ་འདྲ་སྟེ། བདེ་མོ་ཙམ་ཡང་མེད་པར་ཁ་པར་གཏོང་མཚམས་བཞག་སོང་། ༼གསལ་བཤད། འདིར་བསྙེན་པ་ཉུང་ཙམ་བཏོན་ན་དགེ་བའི་འགྱུར་ཁྱད་ཆེན་པོ་མེད་པ་དང་གཞན་གྱི་དགེ་བ་ལ་རྗེས་སུ་ཡི་རངས་བྱེད་མི་དགོས་ཚུལ་ཟུར་ཙམ་ཡང་བཤད་མེད་པས་གོ་བ་ལོག་ལེན་དང་ལོག་འགྲེལ་མི་བྱེད་པའི་རེ་བ་ཡོད།༽ ༢༠༡༨-༡༡-༤

དྲན་བསྐུལ་བཅུ་གསུམ་མ།

དྲན་བསྐུལ་བཅུ་གསུམ་མ།

  དྲན་བསྐུལ་བཅུ་གསུམ་མ།     རང་ཉིད་ལ་སྨྲས་པ། ལྡོང་ཡོན་ཏན་རྒྱ་མཚོ། ༡ གཞན་གྱི་བསྟོད་སྨད་ཙམ་ལ་རེ་ལྟོས་ཆེན་པོ་མ་བྱེད། ཐལ་ཆེ་བའི་བསྟོད་སྨད་དེ་ཚོ་དང་ཁྱོད་ཉིད་ལ་འབྲེལ་བ་ཆེར་མེད། ཁྱོད་ནི་ནམ་ཡང་རང་ཉིད་ལ་རྒྱུས་མངའ་ཆེ་བའི་མི་བུ་དཀྱུས་མ་དེ་ཡིན། ༢ གནས་སྐབས་ཀྱི་ཚོར་བ་དབང་བཙན་པར་བྱས་ཏེ་རིགས་ཞེན་གྱི་སྐད་ཆ་སོགས་ཐལ་ཆེ་བ་མ་བཤད། རང་གི་སྐད་ཆར་འགན་ཁུར་གྱི་འདུ་ཤེས་ཙམ་ཡང་མེད་པའི་མི་ཞིག་གིས་ཆེ་ཆེ་མཐོ་མཐོ་དང་རྒྱ་ཆེན་གཏིང་ཟབ་ཀྱི་བྱ་བཞག་མང་བོ་ཞིག་བསྒྲུབ་མི་ཐུབ་པ་ཐག་གིས་གཅོད་ཆོག ༣ ཆོས་ལུགས་གྲུབ་མཐའ་ཟེར་བ་དེ་ནམ་མཁའ་ལྟ་བུ་ཞིག་རེད། ས་གཞི་དང་ཆ་མཚུངས་པ་ཞིག་རེད། སྐྱེ་བོ་ཁྲི་འབུམ་དེའི་འོག་ན་འཚོ་ཞིང་དེ་ལ་བརྟེན་ནས་ཡོད། དེའི་ཕྱིར། དད་པ་ཡོད་ཀྱང་མེད་ཀྱང་། རྒྱུས་ལོན་བྱས་སམ་མ་བྱས་རུང་། གཞན་གྱི་ཆོས་ལུགས་དང་གྲུབ་མཐར་བརྩི་མཐོང་དང་བཀུར་སྟི་བྱེད་ཤེས་དགོས།  འདི་ནི་བསམ་བློའི་འགལ་འདུ་སྣ་ཚོགས་ལས་རྙེད་པའི་ཁྱོད་ཀྱི་མི་ཚེའི་མྱོང་གོམས་ཡིན། ༤ རང་ཉིད་དང་མི་འཚམ་པའི་ལས་ཀ་མང་བོ་ཞིག་ལ་ཨུ་ཚུགས་མ་རྒྱག  ཨུ་ཚུགས་རིགས་ཤིག་གིས་ཁྱོད་ཀྱི་འོད་སྟོང་འཚེར་འོས་པའི་མི་ཚེ་ལ་ཕམ་ཁ་སྤྲོད་འོང་། ༥ མི་འོས་མི་མཛའ་ཡང་དགོས་དབང་ག་གེ་མོ་ཞིག་གིས་ཁྱོད་ལ་བསྩལ་བའི་མིང་དང་གོ་ས་སོགས་ནམ་ཡང་དང་ལེན་མ་བྱེད།  ཁེ་ཕན་ཅུང་ཟད་ཙམ་ཡང་མི་འཚོལ་བའི་རྒྱལ་སྲས་བྱང་ཆུབ་སེམས་དཔའ་རྐྱང་རྐྱང་གིས་ཁྱོད་བསྐོར་ནས་ཡོད་མི་སྲིད། ཚོགས་འདུ་ཁ་ཤས་ལ་ཞུགས་སུ་འཇུག་པའམ་ཡུལ་བསྐོར་རེ་འགར་ཁྲིད་རྗེས་བཀོལ་བདེ་བའི་མི་བུ་ཁྱོད་ཅི་ཞིག་གི་ལག་ཆར་འགྱུར་འགྲོ། ༦ སྐྱིད་པའི་ཕ་ས་ཕ་ཡུལ་དང་གཉེན་ཉེའི་མཇལ་འཛོམས་སོགས་མང་བོ་ཞིག་བློས་གཏོང་ཁུལ་གྱིས། རྒྱང་ཐག་རིང་བའི་མི་ཡུལ་ལུང་བ་ཞིག་ནས་ཨམ་གཙིགས་བསྡམས་ཏེ་སྡོད་དགོས་དོན། བཟའ་བཏུང་གཉིད་ཉལ་གྱི་རྒྱས་སྤྲོས་འཚོ་བ་དང་རྣམ་གསུམ་ལེ་ལོའི་བྲན་གཡོག་བྱེད་པའི་ཆེད་དུ་མིན་པ་ཤེས་པར་གྱིས། དུས་ཚོད་ཀྱི་ཐག་སྒྲ་དང་འགྲོགས་ཏེ་དོན་ལྡན་རྣམ་དཀར་གྱི་ལས་ལ་བརྩོན་པ་བསྐྱེད་མ་ཐུབ་ན།ཁྱོད་ནི་ཁ་བཤད་དོན་ལ་མི་གནས་པའི་སྨྱུག་འཛིན་པ་ལབ་རྐྱལ་ཞིག་ཡིན། ༧ བཀའ་བསྟན་མང་བོ་བྲག་ལ་བརྩིགས་བརྩིགས་བྱས་ནས་ཅི་བྱེད། གཞན་གྱི་མིག་སྔར་མཛེས་ཆོས་དང་ངོམ་ཆོས་ཙམ་གྱིས་ཆོག་ན། འཕེལ་འགྱུར་རྒོད་པའི་དུས་རབས་འདིར་མི་སེམས་གཏན་དུ་བཟི་བྱེད་ཀྱི་དངོས་རྫས་ཡག་ཡག་མཛེས་མཛེས་མང་བོར་ལག་ཐོགས་མི་དགོས་པས། འགྲུལ་བ་དང་མགྲོན་པོ་དག་ལ་དེ་དག་ཤོམས་ཤིག་དང་ཕལ་མོ་ཆེ་ཞིག་དགའ་སའང་དེ་དག་ཡིན་ངེས། སློབ་གཉེར་བ་ངོ་མ་ཞིག་བྱེད་ན། ཐོས་དོན་རྒྱུད་ལ་སྦྱོར་འདོད་ན། ཉིན་རེ་བཞིན་དཔེ་ཀློག་སྐྱོར་སྦྱོང་གི་རྒྱུན་མཐུད་དེ་རང་སེམས་གྱོང་བོ་འདི་མཉེན་ལ་འབེབ་ཐབས་རེ་ཨེ་རྙེད་ལྟོས་དང་།…

སྡོམ་ཚིག་ཁག་བདུན་པ།

སྡོམ་ཚིག་ཁག་བདུན་པ།

  ད་ལྟ་འཛམ་གླིང་གིས་བོད་མི་ཤེས་པའི་སེམས་ཁྲལ་མེད་མོད། བོད་པས་བོད་མི་ཤེས་པའི་དཀའ་ཁག་དང་གནད་དོན་མང་བོར་འཕྲད་ཀྱིན་ཡོད།                     ལྡོང་ཡོན་ཏན་རྒྱ་མཚོས།          ༢༠༡༧-༡༡-༣༠

སྡོམ་ཚིག་ཁག་དྲུག་པ།

སྡོམ་ཚིག་ཁག་དྲུག་པ།

    འཕེལ་རྒྱས་དང་སྔོན་ཐོན་ཟེར་བ་དེ་བསྒྲུབས་ནས་མངོན་འགྱུར་བྱེད་དགོས་པ་དང་སོང་ནས་ཐོན་དགོས་{གོམ་བགྲོད་གཅིག་བུར་གོ་མི་རུང་།}པ་ཞིག་ལས། བྲིས་ནས་འགྲུབ་འགྲོ་བ་དང་བཤད་ནས་རྙེད་འོང་བ་ཞིག་མ་རེད། དཔེ་ཞིག་གིས་བརྗོད་ན། མེ་ཏོག་སྐྱེ་སྐྱེ་དང་ཆར་བ་འབབ་འབབ་བྱེད་རྒྱུ་ཞིག་ལར་ནས་མེད་དོ།།                            ལྡོང་ཡོན་ཏན་རྒྱ་མཚོས།                               ༢༠༡༧-༡༡-༢༤

སྡོམ་ཚིག་ཁག་ལྔ་བ།

སྡོམ་ཚིག་ཁག་ལྔ་བ།

  སྤྱི་ཚོགས་ཆུང་ཆུང་སྤར་མོ་འདྲ་ཞིག་གི་ནང་དུ། རྙོག་དྲ་མང་བོ་རྒྱ་མཚོ་འདྲ་ཞིག་འཕྱུར་གྱིན་འདུག་ཟེར་ན་ཁྱོད་ཡིད་ཨེ་ཆེས། མི་ཆེས་ན་དེ་ནི་སྒང་བ་བོད་པར་གྲགས་པའི་འུ་ཚང་རེད།                            ལྡོང་ཡོན་ཏན་རྒྱ་མཚོས།                            ༢༠༡༧-༡༡-༡༧

སྡོམ་ཚིག་ཁག་བཞི་པ།

སྡོམ་ཚིག་ཁག་བཞི་པ།

    སྔོན་མི་ཞིག་གིས། བོད་ཟེར་བ་འདི་ཡུན་རིང་བོར་དར་རྒྱས་སུ་འགྲོ་མི་ཐུབ།  རྒྱུ་མཚན། བོད་པ་ཁོ་རང་ཚོ་ནང་ཕན་ཚུན་བར་ཕྲག་དོག་ཧ་ཅང་ཆེ་བས།   ནང་ཕན་ཚུན་བར་འཐེན་འཁྱེར་བྱེད་བཞིན་ཤི་འགྲོ།  ཞེས་བཤད་སྐད།   དོན་ངོ་མར་དེ་འདྲ་ཞིག་བཤད་ཡོད་མེད་མི་ཤེས་མོད།  སྐད་ཆ་དེས་བསྟན་དོན་ནི་ཇི་མ་ཇི་བཞིན་དུ་ཚང་འདུག་པས།     ད་བསམ་ཤེས་ཤིག་བྱེད་མ་ཐུབ་ན། ང་ཚོར་མི་རིགས་འཇིག་ཉེན་ཟེར་བ་དེས་ཁ་གདངས་མིག་ཅེར་བྱས་ནས་སྒུག་འདུག་ཨང་།                        ལྡོང་ཡོན་ཏན་རྒྱ་མཚོས།                        ༢༠༡༧-༡༡-༡༤

ལྡོང་ཡོན་ཏན་རྒྱ་མཚོ་མཆོག་གི་སྡོམ་ཚིག་ཁག་གསུམ་པ།

    བོད་པས་བོད་པར། བོད་སྐད་ཤོད་ཅིག བོད་ཡིག་ཐོན་ཅིག་ཅེས་ནམ་ནམ་ཞར་ཞར་ལ་མ་བརྗོད་ནའང་། རང་གི་བླ་སྲོག་ཚེ་གསུམ་དང་ངོ་བོ་དབྱེར་མེད་དུ་འདྲེས་པའི་ནོར་བུ་དག་ལ་བདག་དོ་དམ་དང་བརྒྱུད་འཛིན་བྱེད་དགོས་པ་ལོས་ཤེས།                         ལྡོང་ཡོན་ཏན་རྒྱ་མཚོས།                        ༢༠༡༧-༤-༥

ལྡོང་ཡོན་ཏན་རྒྱ་མཚོ་མཆོག་གི་སྡོམ་ཚིག་ཁག་གཉིས་པ།

  དུས་ཚོད་གང་མང་ཞིག་ལ་ངས་ཁྲེལ་མེད་བྱས་ཟིན་པ་བདེན་མོད། འཆར་གཞི་དེ་ལས་མང་བོ་ཞིག་གིས་ཀྱང་ང་ལ་ཀུ་རེ་བརྩིས་སོང་།   ལྡོང་ཡོན་ཏན་རྒྱ་མཚོ། ༢༠༡༧-༤-༢༨

ལྡོང་ཡོན་ཏན་རྒྱ་མཚོ་མཆོག་གི་སྡོམ་ཚིག་ཁག་དང་པོ།

  བྱིས་པ་ལ་རྔན་པའམ་ལེགས་སྐྱེས་སུ་བདེ་ཐང་ལ་གནོད་པའི་ཀ་ར་དང་སིལ་ཟས་སོགས་ཉོ་རྒྱུ་བསྐྱུར་ནས། ཁོ་ཚོའི་ན་ཚོད་དང་འཚམ་ལ་རིག་པར་མཐུན་པའི་དཔེ་ཆ་སྤྲོད་རྒྱུའི་གོམས་གཤིས་ཤིག་ཆགས་རྒྱུར་བརྩོན་པ་བསྐྱེད་ན་ལེགས།   ལྡོང་ཡོན་ཏན་རྒྱ་མཚོས། ༢༠༡༧-༤-༡༩