གངས་ལྗོངས་ཐོན་མི་གཉིས་པ་རྗེ་བཙུན་དམུ་དགེ་བསམ་གཏན་རྒྱ་མཚོའི་གདུང་རུས་ཆ་ཚང་བཞུགས་པའི་མཆོད་རྟེན་དང་གཟིམ་ཁྲི་སོགས་ལ་མཇལ་བ། ལྡོང་ཡོན་ཏན་རྒྱ་མཚོ། བྱང་གངས་རིའི་ལྗོངས་ཀྱི་ཆོས་རིག་སྲིད།། དུང་ཉ་ཟླའི་དཔལ་ལ་འགོད་མཁས་པ།། རྗེ་བླ་མ་བསམ་གཏན་རྒྱ་མཚོ་མཁྱེན།། བུ་ང་རང་བྱམས་བརྩེའི་འོད་ཀྱིས་སྐྱོངས།། བོད་ཁ་བ་ཅན་གྱི་ཡར་རྒྱས་ཆེད།། སྐད་ཡི་གེ་རང་སྐྱོང་བྱེད་པའི་ཕྱིར།། སེང་དཀར་མོའི་ ་གད་རྒྱངས་མཐོ་བའི་རྗེ།། དུས་ད་ལྟ་ཞིང་ཁམས་གང་དུ་བཞུགས།། ཆོས་རིག་གནས་རྒྱ་ཆེན་མ་ཤེས་ཀྱང་།། ནང་དད་དམ་རི་མོ་མ་ཉམས་པའི།། མགོན་ཁྱེད་ཀྱི་གསུང་སྐྱེས་སློབ་བུ་བདག། ལས་བསོད་ནམས་ལྕགས་ཀྱུས་གནས་འདིར་དྲངས།། ས་དམུ་དགེའི་ཡུལ་ལུང་མཛེས་སྡུག་འབར།། དགོན་བཀྲ་ཤིས་འཁོར་ལོ་ལྷུན་གྱིས་ཆགས།། རྗེ་བླ་མའི་གཟིམ་ཁང་ཆོས་རིག་རྫོང་།། གཟི་མ་ཉམས་ལོ་རྒྱུས་དཔང་བོར་བརྗིད།། ལུས་གུས་པས་བརྐྱང་ཕྱག་ལན་གསུམ་འཚལ།། ངག་གཙང་མས་སྐུ་བསྟོད་ཚར་གསུམ་བཏོན།། ཡིད་དད་པས་ཚེ་རབས་རྗེས་འཛིན་ཞུས།། རྗེ་བླ་མའི་གསང་གསུམ་ཡོན་ཏན་དྲན། ། སྐུ་མི་བཞུགས་གཟིམ་ཁྲི་སྟོང་བའི་འགྲམ།། བསྲན་མི་བཟོད་དྲན་པ་འཐོར་ལ་ཁད།། ཞག་གཅིག་ལ་རྩེ་གཅིག་གསོལ་འདེབས་ཞུས།། ཐུགས་དགྱེས་པའི་རྟགས་མཚན་རེ་དགའ་བྱུང་།། སྐུའི་གདུང་རུས་ཆ་ཚང་བཞུགས་པའི་རྟེན།། རྗེ་ང་འདྲར་བརྗོད་འོས་སྐུ་བརྙན་དྲུང་།། ཡིད་གདུང་ཤུགས་དྲག་པོས་བླ་མ་བསྒོམས།། ཐུགས་བརྩེ་ཆེན་ཞགས་པས་མི་གཏོང་མཁྱེན།། སྐུའི་ནབ་བཟའ་དབང་ཆས་རྡོར་དྲིལ་སོགས།། བདག་བསོད་ནམས་རྟེན་དུ་ཐོབ་པ་འདིས།། དུས་ཚེ་རབས་ཕྲེང་བའི་འཁོར་ལོ་རུ། ། ཆོས་བདུད་རྩིས་གསོ་བའི་རྟེན་འབྲེལ་འགྲིག ། སྒོམ་ཉམས་བཞེས་གནང་སའི་བཞུགས་གདན་དང་།། གཞུང་གསར་རྩོམ་མཛད་སའི་ཁང་བཟང་དང་།།…
