ལྡོང་ཡོན་ཏན་རྒྱ་མཚོའི་དྲ་བ།

སྒྲ་སྦྱོར་བམ་གཉིས། 

བོད་ཀྱི་ཡིག་བསྒྱུར་ལོ་རྒྱུས་ཐོག་གི་གཞུང་ལུགས་ཐོག་མ་ལྟ་བུར་གྱུར་བའི་སྒྲ་སྦྱོར་བམ་གཉིས་འདི་རྒྱལ་བོ་སུའི་རིང་གཏན་ལ་ཕབ་པའི་ཐད་བཞེད་པ་མི་མཐུན་པ་གཉིས་ཡོད་དེ།  རྒྱལ་དབང་ལྔ་བ་ཆེན་མོའི་དེབ་ཐེར་དཔྱིད་ཀྱི་རྒྱལ་མོའི་གླུ་དབྱངས་ལས།  མངའ་བདག་ཁྲི་ལྡེ་སྲོང་བཙན་རལ་བ་ཅན་བོད་འབངས་ཡོངས་ཀྱི་རལ་བའི་ལན་བུ་རྣམ་པར་འདུད་པའི་སེང་གེ་རྐང་བ་བརྒྱད་པའི་ཁྲི་ལ་མངའ་གསོལ་ཏོ།།  ཞེས་གསུངས་ཤིང་དེའི་མཇུག་ཏུ་མངའ་བདག་རལ་བ་ཅན་གྱི་སྐུ་རིང་ལ་སྐད་གསར་བཅད་ཀྱི་རྣམ་བཞག་སྒྲ་སྦྱོར་བམ་གཉིས་སུ་གཏན་ལ་ཕབ་ཚུལ་ཞིབ་རྒྱས་སུ་བསྟན་ལ།  བུ་སྟོན་རིན་པོ་ཆེས་ཀྱང་།  རྒྱལ་བོ་

སྒྲ་རིག་པའི་ད་ལྟའི་གནས་བབས།

སྤྱིར་སྒྲ་རིག་པ་ཞེས་པ་ནི་འཇིག་རྟེན་ཁམས་ཆེན་པོ་འདིའི་སྐད་རིགས་མི་འདྲ་བ་གང་དང་གང་ཡིན་ཡང་རུང་སྟེ། རང་རང་གི་ཡུལ་གྱི་ཐུན་མིན་དུ་གྱུར་བའི་མིང་དང་། དེ་ལ་བརྗོད་དོན་གསལ་བར་བྱེད་པའི་རྐྱེན་རྣམ་དབྱེ་དང་ཚིག་ཕྲད་སོགས་སྦྱར་བ་ལ་བརྟེན་ནས་ལེགས་པར་བརྡ་འཕྲོད་པའི་ཆོས་ཉིད་གཞིར་བཟུང་སྟེ་གཏན་ལ་ཕབ་པའི་རིག་པའི་གཞུང་ལུགས་ཤིག་ཡིན་ལ། དེ་ལ་སྒྲ་རིག་པའམ་ལུང་སྟོན་པའི་བསྟན་བཅོས་ཞེས་ཀྱང་ཟེར་རོ༎དེའི་ཕྱིར་སྒྲ་རིག་པའི་བསྟན་བཅོས་ནི་སཾ་སྐྲྀ་ཏའི་སྒྲ་རིག་པ་དང་རྒྱལ་སྤྱིའི་སྒྲ་རིག་པ་ཁོ་ན་ལས་མེད་མི་དགོས་པར་ཡི་གེ་ཡོད་པའི་མི་རིགས་ཕལ་ཆེར་ལ་རང་རང་གི་སྐད་དང་

ལི་ཡུལ་གྱི་བར་མཐའ་ཏོང་ཧང་།

གནའ་རབས་རིག་གནས་དང་སྒྱུ་རྩལ་གྱི་བང་མཛོད་ཆེན་པོ་ཏུན་ཧོང་(ཁྱེེེཏྡ)ཞེས་ད་ལྟ་ཀུན་ལ་རླུང་ལྟར་གྲགས་བཞིན་པ་དེ་ནི་རང་ཅག་གི་ཁྲིད་བྱའི་གཞུང་འདིར་ལི་ཡུལ་གྱི་བར་མཐའ་ཞེས་པ་ལས་ས་གནས་གསལ་བོ་ཞིག་གསུངས་མེད་ཀྱང་།  དེ་ནི་དེང་སྐབས་ཀན་སུའུ་ཞིང་ཆེན་གྱི་ནུབ་མཐའི་རྫོང་ཞིག་སྟེ།  ལན་གྲུ་ནས་ལེ་བར་སྟོང་ཕྲག་གཅིག་ལྷག་ཡོད།  གནས་དེ་ནི་སྤྱིར་མྱ་ངམ་གྱི་ཐང་ཞིག་ཡིན་ཡང་།  སྔོན་རྒྱ་ནག་དང་ཕྱི་གླིང་བ།  བོད་དང་ལི་ཡུལ་སོགས་ཀྱི་བར་དར་གོས་ཀྱིས་གཙོས་ཚོང་རྫས་འདྲེན་ལམ་དང་།  ནུབ་མཐའི་འགག་སྒོ་ཞིག་ཡིན་པས་ཟ་འོག་དར་ལམ་ཡང་ཟེར་ཏེ།  ལོ་རྒྱུས་ཀྱི་བཤུལ་

ལབ་ཙེ་དང་དར་ལྕོག

༡ ལབ་ཙེ་ལ་ལ་རྩེ་དང་ལ་བཙས།  ལབ་རྩེ།  ལ་རྫི་སོགས་འབྲི་ཚུལ་དུ་མ་ཞིག་ཡོད།  དེ་ཡང་རྫ་རི་དང་བྲག་རི། གངས་རི་དང་སྤང་རི་རྣམས་ཀྱི་རྩེ་མོར་ལབ་ཙེ་བརྩིགས་པ་ནི་བོད་ཀྱི་ས་ཁོངས་མཚོན་བྱེད་མཆོག་ཏུ་གྱུར་བ་དང་མི་རིགས་གཞན་ལ་མེད་པའི་ཐུན་མིན་གྱི་ཁྱད་ཆོས་ཤིག་ཡིན་ཡང་ཕྱིས་སུ་སོག་པོ་སོགས་འགའ་རེར་ཡང་ནང་ཆོས་དང་ལྷན་ཅིག་ལུགས་དེ་དར།  གནས་གང་དུ་ལབ་ཙེ་ཞིག་ཡོད་ན་དེའི་ཉེ་འཁོར་དུ་བོད་ཀྱི་རུ་སྡེ་རེ་ཡོད་ཅིང་ས་དེ་ནི་བོད་ཀྱི་དབང་རིས་སུ་གཏོགས་པ་མཚོན་ཏེ།  དེང་གི་ཆར་ཡང་ཡུལ་ཁ་ཅིག་ཏུ་སྔོན་གྱི་ས་མཚམས་ཆུ་མཚམས་དེ་ལབ་ཙེ་ཚད་མར་བཟུང་ནས་འབྱེད་མཁན་

ཚགས་པར་ཞིག་བཀླགས་རྗེས་ཀྱི་དྲན་འཆར།

གཟའ་ཉི་མའི་ཉིན་གྱི་ཕྱི་དྲོ་ཞིག་ལ་ང་ཚོའི་སློབ་གྲྭའི་སྤྱི་གཉེར་བས་འཕྲིན་ཡིག་དང་ཚགས་པར། དུས་དེབ་སོགས་མང་བོ་ཞིག་ང་ཡོད་སར་བསྐྱལ་ཡོང་། ཚགས་པར་དང་དུས་དེབ་ལ་བལྟ་རྒྱུ་ནི་ངའི་རྒྱུན་ལྡན་གྱི་འཚོ་བའི་གོམས་སྲོལ་དུ་གྱུར་ཡོད་པས་མྱུར་མོར་ཚགས་པར་ཞིག་ཚུར་བླངས། ཨོ་རེད། ཚགས་པརའདི་འདྲ་(ཕོག་ཐུག་བཟོ་བར་དོགས་ཏེ་ཚགས་པར་གྱི་མིང་མ་བྲིས)ཞིག་ཉེ་སྔོན་ལྷ་ས་ནས་དཔར་བཞིན་པ་ཐོས་ཀྱང་། ལག་སོན་བྱུང་བ་ཐེངས་དང་བོ་ཡིན་པས་སྤྲོ་སྣང་དང་བཅས་ཞིབ་ཀློག་ཚར་གཅིག་བྱས།

བོད་ཀྱི་བརྡ་མཚོན་སྒྱུ་རྩལ་མདོ་ཙམ་གླེང་བ།

རིག་གནས་ལ་བསམ་པའི་རིག་དང་དངོས་པོའི་རིག་གནས་ཞེས་དེང་གི་བཤད་ཚུལ་ལྟར་གཉིས་སུ་འབྱེད་པའི་དབང་དུ་བྱས་ན་བརྡ་མཚོན་ནམ་བརྡ་ཐབས་སྒྱུ་རྩལ་འདི་ནང་བསམ་པའི་རིག་གནས་ཀྱི་ཁྱབ་ཁོངས་སམ་ཡན་ལག་ཏུ་འདུ་ཞིང་།    བོད་མི་རིགས་ནི་འཛམ་གླིང་སྟེང་བརྡ་མཚོན་སྒྱུ་རྩལ་བེད་སྤྱོད་ཆེས་ཆེར་དར་བའི་རྒྱལ་ཁམས་ཤིག་རེད་ཅེས་བརྗོད་ཀྱང་ཐལ་མི་ཆེ་བར་སེམས།  བརྡ་མཚོན་སྒྱུ་འདི་ད་ལྟ་འཛམ་བུའི་གླིང་ཡོངས་ལ་ས་ཁྱབ་རྡོ་ཁྱབ་ཏུ་གྱུར་ཅིང་ཐ་ན་འགྲིམ་འགྲུལ་གཅིག་བུའི་ཕྱོགས་ལའང་རིགས་གནས་རྣམ་པ་མི་འདྲ་བ་བརྡ་ཐབས་དང་སྤྱོད་སྒོ་མི་འདྲ་བ་བརྒྱ་སྟོང་ཙམ་ཞིག་མི་འདུག་གམ། 

དུས་རབས་གཡོ་སྐྱོམ་ཁྲོད་ཀྱི་ཉམས་རྒུད།

མངོན་པ་མཛོད་ལས། ལས་ལས་འཇིག་རྟེན་སྣ་ཚོགས་སྐྱེ། །ཞེས་གསུངས་པ་ལྟར། མཐའ་མེད་སྟོང་བའི་དབྱིངས་སུ་ཕྱི་ནང་རྒྱུ་རྐྱེན་མང་བོའི་ཀློང་རིམ་ནས་རྡུལ་ཕྲན་འདྲེས་སྦྱོར་གྱི་སྒྱུ་འཕྲུལ་གར་དུ་རྩེན་པས། སྟོང་གསུམ་གྱི་སྟོང་ཆེན་པོའི་འཇིག་རྟེན་གྱི་ཁམས་སོགས་གྲངས་དང་ཚད་མི་ལོངས་པའི་གོ་ལ་སྣ་ཚོགས་ལོ་ངོ་ས་ཡ་དུ་མའི་རིང་ལ་རིམ་གྱིས་གྲུབ་ཅིང་། རང་ཅག་བརྟེན་ཅིང་གནས་སའི་གོ་ལ་འདིར་འོད་གསལ་ལྷ་ཡི་ཡུལ་སོགས་ནས་སྡོང་ལོ་རླུང་གིས་ཁྱེར་བ་ཇི་བཞིན་རླུང་སེམས་ལྷན་ཅིག་པའི་རྣམ་ཤེས་འབྱམས་ཀླས་པ་ཞིག་གློ་བུར་དང་གློ་བུར་མ་ཡིན་པའི་སྣང་ཚུལ་གྱིས། མིང་གཟུགས་དང་གཤིས་སྤྱོད་མི་འདྲ་

ཉིན་ཞག་གཅིག་ལ་དུས་ཚོད་བརྩི་ཚུལ།

ཉིན་ཞག་གཅིག་ལ་དུས་ཚོད་བརྩི་ཚུལ་མི་འདྲ་བའི་རིགས་འགའ་ཕན་ཚུན་བསྡུར་ཏེ་བཤད་པ། ཐོག་མའི་གླེང་སྟེགས།    ལྷོ་རྒྱལ་འཛམ་བུ་གླིང་གི་རྒྱ་ཕིབས་སུ་གྲགས་པའི་གངས་ཅན་བོད་ཀྱི་ལྗོངས་ཆེན་པོ་འདིའི་ཕྱི་སྣོད་ཀྱི་འཇིག་རྟེན་དང་།  ནང་བཅུད་ཀྱི་སེམས་ཅན་ནི་སྤྱིར་འཇིག་རྟེན་ཁམས་ཀྱི་སྣོད་བཅུད་ཆགས་པའི་དུས་རིམ་ནས་གྲུབ་པ་ཞིག་ཡིན་པར་སྙོམ་དུ་མེད་གཤིས།  ལས་ལ་བརྩོན་ཞིང་དཔའ་སྟོབས་ཆེ་བའི་ང་ཚོའི་སྔོན་བྱོན་ཡབ་མེས་དག་གིས་འདས་པའི་བགྲང་བྱ་སྟོང་ཕྲག་དུ་མའི་ཡར་སྔོན་ཏེ་གདོད་མའི་སྤྱི་ཚོགས་

ཆུ་ཡི་ཉམས་ཉེས་དང་སྲུང་སྐྱོབས།

_ _ _ _ལྡོང་ཡོན་ཏན་རྒྱ་མཚོ། དབྱར་གསུམ་ཆུ་གཏེར་གྱི་དཔལ་ཡོན་དང་ཡར་ཚེས་ཟླ་བ་གཞོན་ནུའི་གཟི་མདངས་ཇི་བཞིན་བརྡ་འཕྲིན་དུས་རབས་ཀྱི་སྤྱི་ཚོགས་འདི་ཕྱོགས་སྣ་ཚོགས་ནས་འཕེལ་རྒྱས་སུ་འགྲོ་བཞིན་པ་ནི་ཧ་ཅང་དགའ་འོས་པའི་གནས་སུ་མཆིས་མོད། འགྲོ་བ་མིའི་རིགས་འདིས་རང་ཁོ་ནའི་བདེ་སྐྱིད་དང་གནས་སྐབས་ཀྱི་ཁེ་ཕན་ཙམ་ལ་དམིགས་པའི་བསམ་བློ་ཤུགས་ཆེ་དྲགས་པས། སྐྱེ་དགུའི་ཚེ་སྲོག་ལའང་འབྲེལ་བ་ཆེ་བའི་གཏེར་

ངོ་མཚར་ལེགས་བཤད་ལ་བརྟེན་ནས་ཡང་དག་ལེགས་ལམ་འཚོལ་དགོས།

འདས་པའི་བགྲང་བྱ་ཕྲག་གཉིས་ཙམ་གྱི་ཡར་སྔོན་ཏེ་སྤྱི་ལོ་ ༡༩༨༩ ལོར་ང་ཚོ་གདོང་དམར་ཁ་བ་ཅན་པའི་སྐྱབས་མགོན་ཉི་ཟླ་ཟུང་གཅིག་གི་ཡ་གྱལ་ཀུན་གཟིགས་སྣང་མཐའི་མགོན་པོ་ ༧ པཎ་ཆེན་ཨེར་ཏི་ནི་ཆོས་ཀྱི་རྒྱལ་མཚན་དཔལ་བཟང་བོའི་གཟུགས་སྐུ་ཆུ་ཤེལ་དབང་བོ་གློ་བུར་ཞི་དབྱིངས་སུ་གཞོལ་དགོས་བྱུང་བས་བོད་མི་སྤྱི་བོ་གནམ་བསྟན་ཡོངས་ལ་མངོན་བཟོད་མེད་སྐྱོ་གདུང་དྲག་པོས་ནོན་པར་གྱུར་ཚེ་ཕྲན་གྱིས་ཀྱང་འོ་དོད་རིང་མོས་རི་ལུང་བཀང་མྱོང་མོད། སྐབས་དེར་ང་ན་ཚོད་ཕྲ་ཞིང་བྱིས་བློའི་དགའ་ཚལ་ལས་མ་འགོངས་པ་ཞིག་ཡིན་པས། སྐྱབས་མགོན་མཆོག་གིས་སངས་རྒྱས་ཀྱི་བསྟན་པ་དང་བོད་མི་