༄༅།།གངས་ལྗོངས་ཤར་མཐའི་ཆོས་སྲིད་རིག་གནས་ཀྱི་ལྕགས་རི་ལྟ་བུར་གྱུར་བའི་རྔ་བ་ཁུལ་ཟུང་ཆུ་རྫོང་གི་རི་བོ་དགེ་ལུགས་པའི་གདན་ས། སེར་པོ་དགོན་དགའ་ལྡན་ཆོས་འཁོར་གླིང་གི་གཙོས་ལྷ་སྡེ་ཚོ་ཆེན་བཞི་བཅུ་ལྷག་གིས་ཡང་ཡང་གདན་འདྲེན་ཞུས་པ་བཞིན། སློབ་དཔོན་ཆེན་མོ་ལྡོང་ཡོན་ཏན་རྒྱ་མཚོ་མཆོག་སྤྱི་ལོ་༢༠༡༨-༢-༢༦ཉིན་ས་གནས་དེར་ཆེད་ཕེབས་གནང་སྟེ་སེར་སྐྱ་ཆིག་ཁྲི་ཡས་མས་ཤིག་ལ་སྤྱི་ཕན་སློབ་གསོ་ཞེས་པའི་བརྗོད་གཞིའི་སྟེང་ནས་བསླབ་སྟོན་ཟབ་རྒྱས་དང་། འཇམ་དབྱངས་གང་བློ་མ་སོགས་ཀྱི་བཤད་ལུང་གནང་། གློ་བུར་བུ་གཡུ་འབྲུག་སྔོན་མོའི་སྒྲ་སྐད་ལྷང་ལྷང་དུ་གྲགས་པ་སོགས་དགེ་ལྟས་ཡག་པོ་བྱུང་། རྫོང་འཐབ་ཕྱོགས་གཅིག་གྱུར་པུའུ་དང་ཆོས་ལུགས་ཅུའུ། ས་གནས་སྲིད་གཞུང་བཅས་ཀྱི་འགོ་ཁྲིད་རྣམས་དངོས་སུ་འཆད་ཁྲིད་ལ་ཞུགས་ཤིང་སློབ་དཔོན་མཆོག་ལ་བཀའ་དྲིན་ཞུས། ལྡོང་གསུང་ཆོས་རྩོམ་སྒྲིག་ཁང་གསར་འགོད་ཚན་ཁག་ནས་སྤྱི་ལོའི་ཟླ་ཚེས་བཟང་བོར་ཕུལ། 2018.2.26  

སྤྱི་ལོ་༢༠༡༨ལོའི་ཟླ་༢ བོའི་ཚེས་༧་ཉིན་རྔ་ལྗོངས་ཁོར་ཡུག་མྱུར་སྐྱོབ་ཚོགས་པ་བཙུགས་ནས་ལོ་འཁོར་གསུམ་ལོན་པའི་སློབ་གསོའི་འདུ་ཚོགས་སྟེང་སློབ་དཔོན་ཆེན་མོ་ལྡོང་ཡོན་ཏན་རྒྱ་མཚོ་མཆོག་དང་། གཉན་པོ་གཡུ་རྩེའི་སྐྱེ་ཁམས་ཁོར་ཡུག་སྲུང་སྐྱོབ་ཚོགས་པའི་ཚོགས་གཙོ་གཞོན་པ་གངས་ཉིའམ་ཀུན་དགའ་ཚངས་དབྱངས་རྣམ་པ་གཉིས་ཆེད་དུ་གདན་དྲངས་པ་ལྟར་ཕེབས་པ་ན། ཚོགས་མི་ཡོངས་ཀྱིས་ལྷ་དར་གཙང་མས་མདུན་བསུས་ནས་རྒྱ་སྟོད་གཡང་ཁྱིམ་སྟོང་གི་འབྲུག་སྒྲའི་ཚོམས་ཆེན་ནང་དུ་ཁོར་སྲུང་མི་སྣ་དག་གིས་གཙོས་མི་དམངས་སྟོང་ཕྲག་ཁ་ཤས་གདན་འཛོམས་ཏེ་ཚོགས་འདུ་གཟབ་རྒྱས་ངང་འཚོགས། ཚོགས་གཙོ་ལྡོང་བློ་བཟང་སྦྱིན་པས་འགོ་འཛིན་དང་ཚོགས་གཙོ་གཞོན་པ་སྐལ་བཟང་གིས་མཇུག་བསྡུའི་གཏམ་བཤད་བྱས། ཆེད་ཞུས་མཁས་དབང་རྣམ་གཉིས་ཀྱིས་ཁོར་ཡུག་སྲུང་སྐྱོབ་ཀྱི་བྱུང་འཕེལ་དང་། དགོས་ཕན། ཇི་ལྟར་སྲུང་སྐྱོབ་བྱེད་དགོས་པ། གད་སྙིགས་གཙང་སེལ་བྱེད་ཐབས། གད་སྙིགས་རང་དགར་མི་འདོར་བའི་ངེས་ཤེས་དང་ལག་ལེན་རང་ཉིད་ནས་འགོ་བརྩམས་ཤིང་གཞན་ལ་བརྒྱུད་སྒྲོག་བྱེད་པ་གལ་ཆེ་ཚུལ། བདེ་ཐང་སྐོར་གྱི་རྒྱུན་ཤེས། རྒྱ་ནང་ནས་སྐྱེལ་འདྲེན་བྱས་འོང་བའི་ཟས་སྙིགས་དང་གོས་རྙིང་ལ་འཛེམ་དགོས་པ། གཉན་པོ་གཡུ་རྩེའི་ཁོར་སྲུང་གི་ལས་གཞི་ངོ་སྤྲོད་སོགས་གསུང་བཤད་གོ་བདེ་ལ་གནད་དུ་ཁེལ་བ། འཚོ་བ་དངོས་དང་ཁ་ཐག་ཉེ་བ་སོགས་ཞིབ་རྒྱས་སུ་བསྩལ། ཚོགས་པ་འདིར་ད་ལྟ་ཚོགས་མི་བདུན་བརྒྱ་ལྷག་ཡོད་ལ། དེ་རིང་གསར་དུ་ཚོགས་པར་ཞུགས་མཁན་ཡང་མི་བརྒྱ་ལྷག་བྱུང་། ཡང་དག་པའི་གསུང་གི་རྗེས་སུ་འབྲང་བའི་ཚོགས་པ་འདིས་རྔ་ཡུལ་གསེར་མོ་ལྗོངས་སོགས་སུ་བདེ་སྐྱིད་ཀྱི་ཁྱིམ་གཞིས་ངོ་མ་ཞིག་རྒྱུན་བསྲིང་བྱེད་པར་རེ་བ་དང་ཡིད་ཆེས་ཀྱིས་གང་ནས་ཡོད་དོ།།

2018年1月28日有六种不同教派的代表人物和尼姑代表、社会代表、医务代表人物等九大体系的人物近400多名人员在兴海县举行了纪念十世班禅大师逝世二十九周年暨第二期《健康指南》系列光盘发行仪式，与此同时藏族著名教育家、作家东·永丹嘉措大师在这个仪式上荣获藏区无私奉献人物奖。  

སྤྱི་ལོ་༢༠༡༨ལོའི་ཟླ་༡བོའི་ཚེས་༢༨ཉིན་གྲུབ་མཐའ་རིས་མེད་ཀྱི་ཆོས་བརྒྱུད་དྲུག་གི་མི་སྣ་དང་བཙུན་མའི་འཐུས་ཚབ་པ། སྤྱི་ཚོགས་འཐུས་ཚབ་མི་སྣ། ལྷ་རྗེ་བའི་འཐུས་ཚབ་མི་སྣ་སོགས་སྡེ་ཚན་ཆེན་པོ་དགུ་ལས་གྲུབ་པའི་མི་སྣ་བཞི་བརྒྱ་ལྷག་གནས་མཆོག་བྲག་དཀར་རྫོང་དུ་འཛོམས་ཏེ། ཀུན་གཟིགས་པཎ་ཆེན་སྐུ་ཕྲེང་བཅུ་པ་མཆོག་དགོངས་པ་རྫོགས་ནས་ལོ་འཁོར་༢༩འཁོར་བའི་རྗེས་དྲན་ཚོགས་འདུ་དང་འབྲེལ་བའི་བདེ་ཐང་ལམ་སྟོན་འོད་སྡེར་འགྲེལ་སྤེལ་གྱི་བགྲོ་གླེང་ཚོགས་འདུའི་ཐོག བོད་ཀྱི་སློབ་གསོ་བ་དང་རྩོམ་པ་བོ་གྲགས་ཅན་ལྡོང་ཡོན་ཏན་རྒྱ་མཚོ་མཆོག་ལ་གངས་ལྗོངས་ལྷག་བསམ་མི་སྣ་ཞེས་པའི་བྱ་དགའ་ཕུལ།  

རྗེ་བླ་མའི་སྐུ་ཡི་གཟི་བྱིན་དྲན།། 怀念宗师尊贵身 ངའི་ལུས་ཀྱི་སྡིག་སྒྲིབ་འདག་པར་ཤོག ། 吾之身障请洗净 རྗེ་བླ་མའི་གསུང་གི་ཟབ་ཚད་དྲན།། 怀念宗师精妙语 ངའི་ངག་གི་ཉེས་པ་སེལ་བར་ཤོག། 吾之语罪请消除 རྗེ་བླ་མའི་ཐུགས་ཀྱི་རྣོ་དབལ་དྲན།། 怀念宗师尖锐意 ངའི་སེམས་ཀྱི་སྒྲིབ་གཉིས་སངས་པར་ཤོག། 吾心二障请明觉 དུས་དེ་རིང་རྒྱ་མཁར་དཀྱིལ་དུ་ཡོད།། 今天身在都市里 ཕྱིའི་མུན་སེལ་མར་མེ་མཆོད་ཐབས་བྲལ།། 无法供养酥油灯 ཡིད་མོས་གུས་གསོལ་འདེབས་གཙང་མ་ཡིས།། 满怀敬仰清净之 རྗེ་བླ་མའི་གསང་གསུམ་ཡོན་ཏན་དྲན།། 心念宗师三密功 རྗེ་བླ་མར་མི་ཕྱེད་པའི་དད་པ་བརྟན་པོ་ཐོབ་པའི་ལས་སྐལ་བཟང་བོ་ཅན་ལྡོང་ཡོན་ཏན་རྒྱ་མཚོས་དགའ་ལྡན་ལྔ་མཆོད་ཉིན་རྒྱ་ནག་སྤོས་ལྡན་གྲོང་ཁྱེར་དུ་བྲིས། 对宗喀巴大师怀有坚定信心的善缘人士东永丹嘉措于燃灯节汉地蓉城敬造 2017-12-12

སྤྱི་ལོ་ཉིས་སྟོང་བཅོ་བརྒྱད་ལོའི་ཟླ་དང་བོའི་ཚེས་༡༣ཉིན་གངས་ལྗོངས་ཤེས་རིག་ནོར་བུའི་སློབ་གླིང་གི་སློབ་དཔོན་ཆེན་མོ་ལྡོང་ཡོན་ཏན་རྒྱ་མཚོ་ཚང་རྔ་བའི་ཐོན་མིའི་སློབ་ཚོགས་ཀྱིས་བསྒྲུབས་པའི་རིན་མེད་སྤྱི་ཕན་ཟབ་སྦྱོང་འཛིན་གྲྭ་ཐེངས་གསུམ་པའི་སྟེང་ཕེབས་ཏེ་དགེ་སློབ་ཡོངས་ལ་གལ་གནད་ཆེ་བའི་གསུང་བཤད་ཡིད་འཁུལ་བ་མང་བོ་གནང་ཞིང་།  ད་ལོའི་ཟབ་སྦྱོང་གི་དགེ་རྒན་སོགས་ལ་གཟེངས་བསྟོད་བྱ་དགའ་དང་ཁོང་གིས་བརྩམས་པའི་ཧྭར་བ་རིན་པོ་ཆེའི་རྟོགས་བརྗོད་མི་ཕམ་རྣམ་པར་རྒྱལ་བའི་རོལ་མོ་ཞེས་པ་སྒོར་བཞི་སྟོང་ཡས་མས་ཀྱི་རིན་སློབ་མ་ཡོངས་ལ་ལེགས་སྐྱེས་སུ་བསྩལ་བར་མ་ཟད། རྔ་བའི་ཐོན་མིའི་སློབ་ཚོགས་ལ་སྒོར་ཆིག་སྟོང་ཞལ་འདེབས་སུ་གནང་།   སང་ལོའི་རྔ་བའི་ཐོན་མིའི་སློབ་ཚོགས་ཀྱི་གཉེར་བ་དང་དགེ་རྒན་བསྐོ་བཞག་དང་བྱ་བ་བསྒྲུབ་ཕྱོགས་སོགས་ལ་བསླབ་སྟོན་ཡང་མཛད།  

ལྡོང་ཡོན་ཏན་རྒྱ་མཚོ།   འདི་ནས་ཕར་ཕར་སོང་ན། ལེ་བར་ཁྲི་སྟོང་གིས་ཆོད་པའི་ལྷོ་མཐའ་ཞིག་ཏུ། དབུ་སྐྲ་དཀར་ཡང་གསུང་གདངས་མ་ཉམས་པ། དགུང་ན་མཐོ་ཡང་རྒ་བས་མ་ནོན་པའི། སངས་རྒྱས་མི་གཟུགས་སུ་བརྫུས་པ་ཞིག་ཡོད།   ཁོང་གི། སླད་མ་འདྲེས་པའི་དགྱེས་འཛུམ། ས་མཚམས་མེད་པའི་ཐུགས་དཀྱེལ། ཚད་མཐོ་བའི་ལྟ་གྲུབ། ཕྱོགས་སུ་མ་ལྷུང་བའི་བྱམས་བརྩེ། གནའ་དེང་ཆོས་ཚན་གྱི་མཁྱེན་ཡོན། སུ་དང་གང་གིས་གཞལ་ཡང་། ནམ་མཁའི་མཐའ། ཉི་མའི་འོད། རི་བོའི་དཔང་། རྒྱ་མཚོའི་ཟབ་ཚད། མཚོན་དཔེ་དེ་དག་ཇི་བཞིན། ཆེས་ཆེར་འཕགས་ཏེ། ས་ཆེན་པོའི་རྒྱན་དུ་འབར་ཡོད།   ཆོས་ཀྱི་དེད་དཔོན། སྲིད་ཀྱི་ཤིང་རྟ་བ། སྒྱུ་རྩལ་བ། དམག་དོན་པ། ཚན་རིག་པ། ཁེ་ལས་པ། སུ་ཡིས་མཇལ་ཡང་། གང་གིས་བགྲོ་ཡང་། བློ་བསྐྱེད། ངེས་ཤེས། ཐབས་ལམ། བདེ་སྐྱིད། གང་ལ་གང་མཁོའི་དངོས་གྲུབ། ཆད་མེད་དུ་འཇོ་ལ། བླ་ལྷག་གིས་སྩོལ་བའི། ས་ཆེན་གྱི་ནོར་བུ་འོད་འབར། ཧི་མ་ལ་ཡའི་མུ་ཏིག་རྡོག་གཅིག…

རྨ་ཆུ་ཞལ་ཤུལ་དགོན་གྱི་བཀྲ་ཤིས་རྒྱ་མཚོ་དང་། རྔ་སྨད་གདོང་རི་དགོན་གྱི་དར་རྒྱས། ཡུལ་ཤུལ་ཆུ་དམར་ལེབ་ཀྱི་འཕྲིན་ལས་རྣམ་རྒྱལ་སོགས་ཀྱིས་ཡང་ཡང་ཞུས་ངོར།སྤྱི་ལོ་༢༠༡༨ལོའི་ཟླ་༡བོའི་ཚེས་༤ཉིན་ནས་སློབ་དཔོན་ཆེན་མོ་ལྡོང་ཡོན་ཏན་རྒྱ་མཚོ་མཆོག་གིས།ཁོང་གི་བཞུགས་ཤག་ཏུ་རྔ་ཡུལ་སྒོ་མང་དགོན་གྱི་བླ་སྤྲུལ་དང་དགེ་བཤེས་ཁག་གཅིག་གིས་གཙོས། དགོན་སྡེ་བཅུ་ཙམ་གྱི་དོན་གཉེར་ཅན་མང་བོར། བྱང་ཆུབ་ལམ་རིམ་ཆེན་མོའི་ལུང་རྒྱུན་ཡང་དག་པ་གནང་ཞིང་། མཚམས་མཚམས་སུ་བཤད་པ་ངོ་མཚར་བ་མཛད་པས་ཐམས་ཅད་འགྱུར་མེད་དད་པའི་དཔལ་ལ་བཀོད། ཚེས་༩ཉིན་མཇུག་ལེགས་པར་གྲུབ།

སྔ་དྲོའི་གསར་འགྱུར།  སྤྱི་ལོ་༢༠༡༧ལོའི་ཟླ་༡༢པའི་ཚེས་༢༤ཉིན་གྱི་སྔ་དྲོའི་ཆུ་ཚོད་༡༠བའི་སྟེང་། གངས་ལྗོངས་ཤེས་རིག་ནོར་བུའི་སློབ་གླིང་(གླིང་སྟོད་)དུ་༧སློབ་དཔོན་ཆེན་མོ་ལྡོང་ཡོན་ཏན་རྒྱ་མཚོ་མཆོག་གི་དྲ་བ་དབུ་འབྱེད་མཛད་སྒོ་སྤེལ་བའི་ཚོགས་འདུ་འཚོགས། ཐེངས་འདིའི་ཚོགས་འདུ་ལ་གངས་ལྗོངས་ཤེས་རིག་ནོར་བུའི་སློབ་གླིང་གི་དགེ་རྒན་དང་ལས་བཟོ་བ་ཡོངས། དེ་མིན་ལྡོང་གསུང་ཆོས་ཁང་གི་ཚོགས་མི་ཡོངས། རེ་བ་གསར་བ་ཚང་གི་འཐུས་ཚབ་པ།མཐར་ཕྱིན་འཛིན་གྲྭ་གཉིས་བཅས་ཞུགས།ཚོགས་སྟེང་དུ་༧སློབ་དཔོན་ལྡོང་ཡོན་ཏན་རྒྱ་མཚོ་མཆོག་གིས་དྲ་བ་འདི་ཉིད་ཁོང་གི་མཚན་སྙན་གྲགས་རྒྱས་ཐབས་ཀྱི་ཆེད་དུ་དམིགས་ནས་བཟོས་པ་ཞིག་མ་ཡིན་པར། ཁོང་གི་གསུང་བཤད་དང་བརྩམས་ཆོས་ལ་དད་པ་དང་དགའ་བ་ཡོད་མཁན་གྱི་རེ་བ་གསར་བ་ཚང་གིས་ཡང་ཡང་འདི་ལྟ་བུའི་དྲ་ཚིགས་ཤིག་ཡོད་ན་མང་བོ་ཞིག་ལ་ཕན་ཐོགས་ཚུལ་ཞུས་ཏེ་མཐུན་རྐྱེན་སྦྱར་ནས་བཟོས་པ་ཡིན་ཚུལ་གྱི་སྐོར་ནས་ངོ་སྤྲོད་གནང་ཞིང་། དེ་བཞིན་རེ་བ་གསར་བ་ཚང་གི་སྤྲེལ་ཚང་བརྩོན་འགྲུས་ཀྱིས་དྲ་བ་འདི་གཉེར་བའི་དམིགས་ཡུལ་གྱི་སྐོར་ནས་གཏམ་བཤད་སྤེལ་བ་དང་། དྲ་ཚིགས་དོ་དམ་པ་ཟངས་དཀར་ཚུལ་ཁྲིམས་ཀྱིས་དྲ་བའི་བྱེད་ནུས་དང་ཁྱད་ཆོས་ལས་འཕྲོས་ཏེ་བརྡ་འཕྲིན་དྲ་རྒྱའི་དགེ་མཚན་གྱི་སྐོར་ནས་ངོ་སྤྲོད་ཞིབ་རྒྱས་གནང་། ད་དུང་ལྡོང་གསུང་ཆོས་ཁང་གི་འགོ་གཙོ་ས་སྒང་འཇམ་དབྱངས་མཁྱེན་རབ་ཀྱིས་སྤྱི་སྡོམ་གནང་ཞིང་། མཇུག་མཐར་རོགས་སྐྱོར་བར་བཀའ་དྲིན་ཞུ་བའི་གཟི་བརྗིད་དཔང་ཡིག་ཕུལ་ཏེ་ཚོགས་འདུ་གྲོལ། དྲ་བ་ཤར་གཏོང་མཛད་སྒོའི་དྲན་རྟེན་མཉམ་པར།  

ཕྱི་དྲོ་ཆུ་ཚོད་༢:༣༠སྟེང་ཡང་བསྐྱར་༧སློབ་དཔོན་དམ་པ་ལྡོང་ཡོན་ཏན་རྒྱ་མཚོ་མཆོག་དབུ་བཞུགས་མཛད་དེ་ལྡོང་གསུང་ཆོས་ཁང་གི་སྐབས་གཉིས་པའི་བཞུགས་མོལ་ཚོགས་འདུ་གངས་ལྗོངས་ཤེས་རིག་ནོར་བུའི་སློབ་གླིང་དུ་འཚོགས་ཤིང་། ཚོགས་སྟེང་དུ་ཚོགས་མི་སོ་སོས་ལོ་གཅིག་གི་རིང་ཁོང་གི་གསུང་བཤད་ཕབ་བསྒྱུར་བྱས་པའི་སྐོར་ནས་མཉམ་མྱོང་བརྗེ་རེས་དང་འབྲེལ་ཏེ་གལ་ཆེའི་བསམ་ཚུལ་ལྷུག་བརྗོད་གནང་། མཇུག་མཐར་ལོ་གཅིག་གི་རིང་གསུང་བཤད་ཡིག་ཕབ་པ་རྟ་ནག་སྐལ་བཟང་ལུང་རིགས་དང་འབའ་གཞུང་འཇིགས་མེད་གཉིས་ཀྱིས་གསུང་བཤད་ཡིག་ཕབ་བྱས་པ་ཆེས་མང་བས་གཟི་བརྗིད་བྱ་དགའ་གནང་སྟེ་ཚོགས་འདུ་བདེ་བླག་ངང་གྲོལ།     ༧སློབ་དཔོན་དམ་པ་ལྡོང་ཡོན་ཏན་རྒྱ་མཚོ་མཆོག་གི་གསུང་ཆོས་རྩོམ་སྒྲིག་ཁང་གི་སྐབས་གཉིས་པའི་བཞུགས་མོལ་ཚོགས་འདུའི་མཉམ་པར།