ལྡོང་ཡོན་ཏན་རྒྱ་མཚོའི་དྲ་བ།

སེམས་པའི་ཨ་ལོང་སྦྲེལ་དང་གངས་ཅན་པ།

དབུས་གཙང་ཡུལ་ན་ཆོས་སྲིད་གཡུ་མཚོ་འཕྱུར། །

ཨ་མདོའི་ཡུལ་ན་རིག་གནས་ཉི་འོད་འབར།     །

ཁམས་པའི་ཡུལ་ན་དཔལ་འབྱོར་འཕེལ་ཁ་དར། །

སེམས་པའི་ཨ་ལོང་སྦྲེལ་དང་གངས་ཅན་པ།  །

སྐྱབས་གཅིག་བླ་མའི་བྱམས་བརྩེ་མཚོ་ལྟར་ཟབ།།

མི་ཆེན་དཔོན་པོའི་མཁྱེན་རྒྱ་མཁའ་ལྟར་ཡངས། །

གནའ་དེང་མཁས་པའི་རིག་པ་གློག་ལས་མྱུར།   །

སེམས་པའི་ཨ་ལོང་སྦྲེལ་དང་གངས་ཅན་པ།  །

 

སྲོལ་རྒྱུན་རིག་པའི་དགེ་མཚན་འོད་དུ་འཚེར།  །

གསར་དར་ཤེས་བྱའི་ཕན་རླབས་དགོང་དུ་འཕྱུར།།

མ་བཅོས་རང་གཤིས་སྨྱུག་མའི་མདའ་ལས་དྲང་།  །

སེམས་པའི་ཨ་ལོང་སྦྲེལ་དང་གངས་ཅན་པ། །

 

རྒན་པོར་སྲིད་པ་ཆགས་པའི་བསླབ་བྱ་ཡོད།  །

གཞོན་པར་མི་རིགས་སྐྱོང་གི་དཔའ་སྤོབས་ཡོད། །

བྱིས་པར་སློབ་གྲྭར་འགྲིམ་པའི་སྤྲོ་བ་ཡོད།  །

སེམས་པའི་ཨ་ལོང་སྦྲེལ་དང་གངས་ཅན་པ། །