ལྡོང་ཡོན་ཏན་རྒྱ་མཚོའི་དྲ་བ།

བྲེ་སེར་འབྲོང་གི་རྭ་རྩེད།

ཕྱི་ནང་ཁ་ཆར་ཙག་སེར་གདོང་གིས་བསུ་ཞིང་། །

ལྷན་སྐྱེས་རྭ་རྩེ་རྣོན་པོ་བྲག་ལ་བརྡར་བའི།  །

རྩལ་སྟོབས་གཤིས་སུ་རྫོགས་པའི་བྲེ་སེར་འབྲོང་རྒོད། །

གངས་བྲག་གཡའ་སྤང་རི་ཡི་མུ་ཏིག་རྡོག་གཅིག  །

 

མཐོན་པོ་ཤེལ་དཀར་རི་བོ་བསྟར་ལ་བསྒྲིགས་ཤིང་།།

མཉེན་འཇམ་རྩྭ་ལྗང་གཡུ་ལོ་གདན་དུ་བཏིང་བའི།།

ལྷོ་གླིང་ཏོག་ཏུ་ཆགས་པ་ཉི་མའི་རྒྱལ་ཁམས། །

རྨིག་བཞི་རླུང་གི་སྤུ་གྲིས་རྩེད་འཇོ་ངོམ་ས། །

 

འཚོ་བའི་རྟེན་ལ་དཀར་དམར་མེ་ཏོག་འབུམ་ཕྲག །

བཏུང་བའི་བཅུད་ལ་དྭངས་གཙང་ཆུ་ཕྲན་འབུམ་ཕྲག །

འབུམ་ཕྲག་རང་བྱུང་དཔལ་གྱིས་བསྐྱེད་ཅིང་བསྲིངས་པས།།

མ་བཅོས་དཔའ་སྤོབས་མཐོན་པོ་རྭ་རྩེར་བཅོལ་ཡོད།།

 

ལས་འདི་རམ་དཀརརྩྭ་ལ་བརྟེན་པའི་དྲིན་གྱིས།།

གདུག་རྩུབ་མཆེ་སྡེར་རྣོན་པོ་སུ་ལའང་མ་གཙིགས།།

བག་ཕེབས་རི་སྐྱེས་རྩེན་པའི་གར་དང་ལྷན་ཅིག །

འཚེ་བྲལ་འཚོ་བའི་ཀློང་གི་ངུར་དབྱངས་སྙན་ཨང་།།

 

གངས་སེང་གཡུ་རལ་ཅན་པོར་དུང་བའི་རྟགས་སུ།།

མ་བརྩིགས་གངས་རིའི་ངོགས་སུ་རྨིག་རྗེས་བཞག་ཡོད།།

ཤ་ཁྲག་ཚོགས་འཁོར་ལས་ལ་ཞེད་སྣང་ཆེ་བས།།

ང་དང་གཅན་གཟན་སྟག་མོའི་བར་ཐག་མཚོ་ཡིན།།

 

སྐལ་བ་རྫོགས་ལྡན་དྲོད་ཀྱིས་ས་ཆེན་བརླན་ཚེ།།

ང་དང་རི་སྐྱེས་གཅན་གཟན་སྐྱིད་པའི་རྫོང་ཡིན།།

མགོ་ནག་མི་ཡི་ཧམ་སེམས་ལྕགས་ཀྱུ་རིང་མོས།།

སྒང་གཤོང་བར་མེད་བཟུང་བའི་གདུག་རྩུབ་ཨ་ཙ།།

 

སྨུག་སྤྲིན་ལྷོ་ལ་ཕྱོགས་པའི་འདུ་འགོད་བར་ནས།།

འདབ་དྲུག་ཁ་བའི་མེ་ཏོག་དགུ་བརྩེགས་བབས་པས།།

སྨུག་པོ་འབྲོང་གི་ཁྱུ་ཚོགས་ཨར་ལ་བཏད་ཚེ།།

ཉི་འོད་སེར་བོར་འཁྲེང་འཁྲེང་སུ་ལའང་མ་འཁྲེང་། །

 

འབྲོང་ཤ་ཚོན་པོའི་ཚོགས་འཁོར་ཁྱེད་ཚོར་ཞིམ་ཡོད། །

ཚེ་སྲོག་འགག་པའི་འཇིགས་སྐྲག་ང་ཚོས་མྱོང་ཡོད། །

འབྲོང་ཀོ་མཐུག་པོའི་གོས་བཟང་ཁྱེད་ཚོར་དྲོ་ཡོད། །

ཤ་ཁྲག་རུས་པའི་དཔྱ་ཁྲལ་ང་ཚོར་ལྕི་ཡོད། །

 

ཟླ་བ་ཡར་ཚེས་ཤིག་གི་དཔལ་དང་འགྲོགས་ཏེ། །

བྲེ་སེར་འབྲོང་གི་གྲགས་སྙན་ནུབ་མཐར་ཤོར་སྐད། །

སྐྲ་དང་པགས་པའི་ཁ་དོག་དཀར་དམར་སེར་གསུམ། །

སྣ་ཚོགས་མགྲོན་པོའི་ཡོ་ལངས་སྤྲིན་བཞིན་དཀྲིགས་སོ། །

 

ལ་ལ་འབྲོང་རྭའི་སྒྲ་སྙན་དཀྲོལ་ལ་དགའ་ཞིང་།།

ཁ་ཅིག་འབྲོང་ཁྱུའི་བྱུང་བར་རྣ་བ་ཀྲོང་ཀྲོང་།།

གཞན་དག་འབྲོང་ཕྲུག་ལས་ལ་གདུང་སེམས་མཉམ་བསྐྱེད།།

ཐམས་ཅད་གྲོས་ཐག་བཅད་པ་འབྲོང་རྒྱུད་དར་སྤེལ།།

 

འབྲོང་མོ་ངུར་སྒྲ་དིར་རེར་རྫ་ལ་གཤར་བས།།

འབྲོང་ཕྲུག་སྐྱིད་པའི་རྭ་རྩེད་བྱེད་ཁོམ་མ་བྱུང་།།

ཅེ་སྤྱང་ཤ་ལ་རྔམ་པའི་དུག་རླངས་ཕོག་ཞོར།།

གཡུང་དྲུང་སྲོག་གི་ཀ་བ་གངས་ལ་བཙུགས་ཡོད།།

 

རྐང་གཉིས་མི་ཡི་བསོད་ནམས་སེར་བོ་གསེར་རེད།།

དབུགས་ལྡན་སྐྱེ་འགྲོ་གཞག་དག་ཁྱེད་ལ་སྨོན་ཡོད།།

མཆོག་དཀར་གཞུ་མོའི་སྒུར་ཁ་ཚུར་ལ་མ་གཏོད།།

བྲེ་སེར་འབྲོང་ཡང་རང་བྱུང་ཁམས་ཀྱི་རྒྱན་ཡིན། །

 

གནག་སྣུམ་རྩུད་པའི་མཆོད་པ་ཅི་འདོད་ཕུལ་ཆོག །

མར་ཆུར་འོ་ཞོའི་དཔལ་ལ་ཅི་འདོད་རོལ་ཆོག །

བླང་དོར་བློ་གྲོས་བཀྲ་བའི་ཤེས་ལྡན་ཚོགས་ཀྱིས། །

ཚུར་ལ་བྱམས་པའི་མིག་ཞགས་ལན་གཅིག་འཕེན་རོགས།།

 

དུས་རབས་ཉེར་གཅིག་འཕྲུལ་གྱིས་དབང་མེད་དྲངས་པའི། །

འཆམ་མཐུན་སྤྱི་ཚོགས་གླེང་བརྗོད་ཁྱེད་ཚོས་སྦེལ་འདུག །

ཁ་ཚིག་དོན་ལ་གནས་བའི་འཛུམ་ཞིག་སྟོན་དང་། །

བྲེ་སེར་འབྲོང་ཁྱུ་མཐོན་པོའི་རི་ལས་བབས་འོང་། །

 

ངེས་འབྱུང་རླུང་བུས་བསུས་ཏེ་རི་ལ་མ་སོང་། །

གཉིས་འཛིན་གདོན་གྱིས་ཁྲིད་དེ་གཡང་ལ་མ་མཆོང་། །

ཞེན་ཆགས་མིང་ཟུང་སྐྱིད་པའི་ཕ་སར་ཤོར་བཞིན། །

དགོ་དགོའི་དབྱངས་ལ་འགུག་པའི་འབོད་པར་སྒུག་ཡོད། །

 

གནས་ལུགས་ཐང་མར་བརྡལ་བའི་ངག་རྩལ་མེད་ཀྱང་། །

རང་གཅེས་བདེན་དོན་གཤིས་ལ་འཇའ་ཚོན་བཞད་པས། །

བྲེ་སེར་འབྲོང་གི་རྭ་རྩེད་བྱེད་སྟངས་ཤིག་ལས། །

སེམས་ཀྱི་འཕར་ལྡང་དྲག་པོ་མཁྱེན་པར་མཛོད་དང་།།