ལྡོང་ཡོན་ཏན་རྒྱ་མཚོའི་དྲ་བ།

 ཁ་བ་བབས་བྱུང་།

ཁ་བ་བབས་བྱུང་།   མེ་ཏོག་བཞིན་བབས་བྱུང་།

མཐོ་བ་གངས་རིའི་རྩེ་མོ།   དམའ་བ་སྤང་གཞོང་ཡངས་མོ།

ཁ་བའི་གོས་དཀར་གྱིས་གཡོག་སོང་། ཁ་བའི་མེ་ཏོག་གིས་གང་སོང་།

ཁ་བ་དཀར་བོ།   བཀྲ་ཤིས་པའི་མཚོན་རྟགས་གསར་བ་ཡིན།

ཁ་བ་དཀར་བོ།   བོད་གདོང་དམར་ཚང་གི་གཤིས་ཀ་ཡིན།

ཁ་བ་བོད་ལ་བབས་པས།  བོད་པའི་ལྷག་བསམ་དཀར་དཀར།

ཁ་བ་བོད་ལ་བབས་པས།  བོད་པའི་རང་གཤིས་དཀར་དཀར།

ང་ཁ་བའི་བུ་མོ་བོད་ལ་དགའ།  ང་བོད་པའི་བུ་མོ་ཁ་བར་དགའ།

 

ཁ་བ་བབས་བྱུང་།  དར་དཀར་བཞིན་བབས་བྱུང་།

འབྲོག་པའི་ལྷས་ར་གོར་མོ།  ཞིང་བའི་ཁང་ཆུང་གྲུ་བཞི།

ཁ་བའི་གཡང་ནོར་གྱིས་གང་སོང་།  ཁ་བའི་གཡང་འབྲུ་ཡིས་ཕྱུག་སོང་།

ཁ་བ་དཀར་བོ།  འབྲོག་བུ་མོ་དགའ་བའི་མགྲོན་པོ་ཡིན།

ཁ་བ་དཀར་བོ།  ཞིང་སོ་ནམ་འཕེལ་བའི་གཞི་མ་ཡིན།

ཁ་བ་འབྲོག་ལ་བབས་པས།  འབྲོག་པའི་འཚོ་བ་དཀར་དཀར།

ཁ་བ་རོང་ལ་བབས་པས།  རོང་བའི་སེམས་པ་དཀར་དཀར།

ང་འབྲོག་རུའི་བུ་མོ་ཁ་བར་དགའ། ང་གངས་རིའི་བདག་མོ་ཁ་བར་དགའ།

ལྡོང་ཡོན་ཏན་རྒྱ་མཚོ།

 

 

འདི་ནས་གཞན་ལ་བརྒྱུད་བསྐུར་གནང་རོགས།